Ester K. Hasle, 
FoU-koordinator HiST
 

Blir HiST smugla inn 
bakvegen i NTNU?
Rapporten om evt. samlokalisering av NTNU og HiST kom 3. mars.  Som vararepresentant til bystyret fekk eg muntleg orientering frå prosjektorganisasjonen, Samskipnaden, NTNU-rektoren og HiST-direktøren, med etterfølgjande spørsmål/ kommentarar + innbunden, fargesprakande rapport. Eg håpar på tilsvarande orientering og diskusjon rundt på HiST - her har det vore alt for stille om denne viktige saka.
Konklusjonen i rapporten er som venta: Rapporten må oppfattast som eit argument for å samle heile NTNU og HiST i Øya-Gløshaugenområdet, sjølv om også to campusar er mogeleg. Stordrift løner seg, seier dei. NTNU skal gå 250 mill i overskot på sal av Dragvoll og HiST skal teoretisk spara 6-7 mill kr pr. år i husleige.  Rett nok manglar «hjarta» i dette alternativet - dvs. minst 600 mill kr og 25 000 m2 til felles læringssenter, men det må Staten ordne (kanskje kjem bygget på departementets prioriteringsliste innan ein 30 års tid?).  Heller ikkje HiST sine kostnader med husleige/drift av eit slikt framtidig senter er lagt inn i reknestykket så vidt eg ser.
Ved å behalde Dragvoll og leggja 3000 nye boligar på kornåkrane der oppe, får NTNU finansiert læringssenter båe stader + utviding på Dragvoll.  HiST vil her få 15 mill kr årleg i auka husleige og drift ved å flytte alle sine avdelingar nær NTNU, seier rapporten, fordi då kan ein ikkje bruke læringssenteret til NTNU.
Begge campusløysingane op-nar for å partere HiST og plassere dei enkelte HiST-miljøa rundt omkring på Gløshaugen og på Øya. HiST sitt utgangspunkt for å planlegge nybygg var vel å samle HiST??
HiST disponerer i dag om lag 77 000 m2. Mange av avdelingane har i dag plassmangel, og det er uhensiktsmessig at HiST er spreidd på 7 stader. 
Helse- og sosial har ønska seg nybygg nær St. Olav. Teknologi har planlagt nybygg sidan 1960.
Teoretikarane bak denne rapportane har ved hjelp av ein amerikansk planleggingsmodell funne ut at HiST treng berre 61 000 m2 dersom båe institusjonane blir samla, fordi HiST-studentane skal vrimle inn i dette felles læringssenteret, som det altså ikkje finst pengar til i prosjektet!! Dersom NTNU-Dragvoll består, seier planleggingsmodellen at HiST treng 68 000 m2 inkl. eige bibliotek.   
For å ta eit døme som eg sjølv kjenner godt, så må AFT - med dagens plassmangel - likevel tåle ein arealreduksjon på 33 % i eitt av dei skisserte alternativa.  I scenariet med AFT plassert i kommunens kondemnable høghus får dei behalde så mykje som 87 % av dagens areal. «Nokon» får seg nok ei økonomisk overrasking om dette håplause bygget skal konverterast til akseptable laboratorieareal.
Teoretisk sett skal HiST spara masse driftsutgifter på samlokalisering med NTNU. Sidan eg også har arbeidd 16 år ved NTH (NTNU), veit eg at infrastrukturkostnadane der er mykje høgare enn ved HiST. Vi har ein liten, effektiv driftsorganisasjon.  NTNU har også betydeleg større felles datakostnader, bibliotekskostnader osb. pr. tilsett og pr. student enn HiST. Som AFT-direktør måtte eg seie opp biblioteksavtalen med medisinarbiblioteket og vise bio-ing.studentane til Kalvskinnet fordi vi ikkje hadde råd til å betala den prisen pr. student som medisin kravde. Undervisninga kan bli skadelidande dersom driftskostnadane våre i framtida blir styrde av NTNU.
Eit argument for samlokaliseringa er at studentane vil til bynær campus. Prosjektleiinga lovprisa på orienteringsmøtet  den bynære campusen nær elva med gamle ærverdige bygningar som alle studentane vil til. Slik orda fall var Kalvskinnet den campusen som passa best til beskrivinga. 
Folk på talelista før meg etterlyste då også planar for «indrefileten» Kalvskinnet.  I møtet etterlyste eg kvifor ikkje dette prosjektet inneheld ein skisse for samlokalisering av HiST i aksen Kalvskinnet-Øya. Der er kortare internavstand avstand enn mellom Øya og arealet sør for Realfagbygget.  Dessutan er det mykje rimelgare å sleppe flytte/tilpasse den tyngste og mest labtunge delen av HiST.  
NTNU er fornuftige nok til å avvise samorganisering med HiST. Då bør vi utvikle våre to sjølvstendige institusjonar på kvar våre campusar. Vi skal ikkje «snikinnmelde» HiST i NTNU. Høgskoledirektøren repliserte til meg at Statbygg/KLP/E.C.Dahls eigedom ikkje har vore på banen. Men Statsbygg har alt brukt 4 mill av eigne midlar til å prosjektere nybygg for HiST. Som tidlegare framkome er denne gruppa interesserte i ein dialog med HiST om utnytting av sine arealar (i motsetning til Lykke). 
I dag har HiST tilhald i rundt 30 000 m2 på Kalvskinnet. Med Statsbygg sitt nybygg, som var ferdig prosjektert og finansiert då bygginga vart stoppa pga Marien-borgplanane, vil HiST kunne disponere rundt 45 000 m2 på Kalvskinnet, og ein har/får rundt 10 000 m2 i St. Olav/Øya.  Ved å be departementet om ei tilleggshusleigeløyving på nokre fåe mill kroner attåt Ranheimsbyggleiga er også eit nytt helse/sosialbygg leigefinansiert. Det er nok ein enklare veg enn å få eit stort læringssenter inn på departementets prioriteringsliste. Dessutan åtvarar mange fagfolk på NTNU mot læringssenter.  Dei vil ikkje ha det - påstår det er for gamaldags pedagogisk tenking.
Alle studentane er ikkje like. Mange kjem til HiST frå NTNU fordi miljøa der oppe er for store og upersonlege.  Ein diger felles studentfabrikk kan skræme bort fleire studentar enn han vil dra til seg.
HiST skal gjera sitt vedtak om lokalisering i HS-møte 3. mai, NTNU i møte 10. mai. HiST legg så opp til eit mulig ekstraordinært HS-møte 15. mai. Normalt burde den største interessenten gjera sitt vedtak først.  Er ein så sikker på kva HiST-styret skal meine så ein satsar på eit «HiST-sug» i denne saka??
NTNU ser ut til å ha lagt opp til ein demokratisk og inkluderande høringsprosess. Via eit elektronisk spørjeskjema skal alle tilsette og studentar ved NTNU få seie kva dei meiner om denne saka, i tillegg til vanleg høringsrunde. Det er naturleg at alle HiST-tilsette og studentar får ta del i ein like inkluderande prosess. So langt er mitt inntrykk diverre at HiST-prosessen har vore fullstendig fråverande - ingen infomøter om prosjektet, ingen diskusjonsforum. Er leiinga redd for å få fram dei ulike meiningane? Om informasjonsflyten framleis skal gå via hoderystande kommentarar og rykter i korridorane, tener det HiST til liten ære.